डाक्टर पुकार चन्द्र श्रेष्ठ 
केन्द्रमा औपचारिक सुरु गरिएको ओपीडी सेवामा डा. पुकारचन्द्र श्रेष्ठको नेतृत्वमा डा. कल्पना श्रेष्ठ, डा.लुसन सिंह र डा. सन्तोष गुरुङ्गले बिरामीहरुको स्वास्थ्य परीक्षण गर्नेछन् । अस्पतालको रुप पाए मानव अंग प्रत्यारोपणमात्रै होइन उक्त क्षेत्रमा देशलाई आवश्यक पर्ने जनशक्ति उत्पादन केन्द्र केन्द्रको रुपमा विकास गर्ने लक्ष्य रहेको बताउने केन्द्रका प्रमुख डा. पुकारचन्द्र श्रेष्ठसँग माईभक्तपुरडटकम प्रतिनिधि ईश्वरकाजी खाइजूले गरेको संक्षिप्त कुराकानी यहाँ प्रस्तुत छ –
प्रश्न ः भक्तपुरस्थित मानव अंग प्रत्यारोपण केन्द्र अस्पताल बने कसरी सेवा प्रवाह गर्नुहुन्छ ?
डा. श्रेष्ठ ः केन्द्रको स्वास्थ्य सेवा भर्खर सुरु भएको छ । धेरै काम गर्न बाँकी छ । यस्तो अवस्थामा व्यवसायिक प्रतिबद्धतामात्र पर्याप्त हुँदैन । सरकारको पूर्ण सहयोग र समर्थनका साथै भक्तपुरका राजनीतिक दल, संघसंस्था र सर्वसाधारणले पनि सोही किसिमको साथ, सहयोग र प्रतिबद्धता व्यक्त गरे मानव अंग प्रत्यारोपण केन्द्र देशको मात्रै नभई दक्षिण एसियाकै नमुना केन्द्रको रुपमा विकास गर्नेछौं । यसले मृगौलामात्रै होइन क्रमिक रुपमा कलेजो, मुटु, फोक्सो, प्यान्क्रियाज, रक्तमासीलगायतको प्रत्यारोपणको लागि आवश्यक पूर्वाधार तयार गर्दै जान्छ । त्यसैगरी अंग प्रत्यारोपण गर्नेमात्र नभई अंग फेल हुनबाट बचाउन जनचेतनामूलक कार्यक्रम गर्ने र अंग प्रत्यारोपितहरुका लागि पुनरुत्थानको कार्यसमेत गर्नुपर्नेछ । अंग दानसम्बन्धी ठोस नीति बनाउने तथा त्यसअनुसार दान गर्ने प्रभावकारी कार्यक्रम गर्नु अति आवश्यक छ ।
प्रश्न ः त्यसको लागि आवश्यक जनशक्ति, पूर्वाधार र उपकरणहरुको व्यवस्था कसरी गर्नुहुन्छ ?
डा. श्रेष्ठ ः केन्द्र राम्ररी सञ्चालन हुन यसलाई आवश्यक भौतिक पूर्वाधार र जनशक्तिको परिपूर्ति हुनुपर्छ । तत्काललाई भक्तपुर अस्पताल, वीर अस्पताललगायतबाट सहयोग लिन सकिन्छ । त्यसको लागि यी अस्पतालहरुको सेवा तथा सुविधाको पनि स्तर वृद्धि हुनुपर्छ । साथै केन्द्रमा दक्ष र योग्य जनशक्तिसहितको छुट्टै आईसीयू, कार्डियोलोजी, रेडियोलोजी, प्याथोलोजी आदिको सेवा विकास गरिनु अति आवश्यक छ ।
प्रश्न ः केन्द्र अस्पताल भएपछि वीरमा सञ्चालित मृगौला प्रत्यारोपण एकाइ यहाँ सर्छ ?
डा. श्रेष्ठ ः हामीले वीरसँग मद्दत लिने हो । त्यहाँ बन्द गरेर यहाँ सेवा दिने राजनीतिक खिचातानी गर्नुहुँदैन । वीरमा पहिले मुटुको छुट्टै एकाइ थियो । त्यसैबाट अहिले सहिद गंगालाल जस्तो स्तरीय अस्पताल विकास भएको छ । यस केन्द्रलाई पनि त्यसरी नै स्वायत्त रुपमा विकास गर्दै जानुपर्छ ।
साथै मानव अंग प्रत्यारोपणको लागि देशको लागि आवश्यक अन्य जनशक्ति उत्पादन गर्ने केन्द्रको रुपमा पनि यसलाई विकास गर्नुपर्छ । त्यसको लागि दीर्घकालीन नीति तथा कार्यक्रम बनाउनु अत्यावश्यक छ ।